مريض السكر| غيبوبة السكر|انخفاض السكر في الدم

 

مريض السكر في الطوارئ

في المقالة دي هنتكلم عن ازاي نتعامل مع انخفاض السكر في الاستقبال او الطوارئ ، لو مريض سكر جالك الاستقبال او الطوارئ  هتكون خائف من حاجتين اثنين :

·       يا اما السكر يكون عالي وعامل مشاكل وده هنتكلم عنه بعد كده

·       يا اما السكر يكون منخفض وعامل مشاكل وده اللي هنتكلم عنه في المقالة دي ان شاء الله ……

انخفاض سكر الدم

انخفاض السكر غالبا عيان بيكون عنده سكر في الاساس اخذ الانسولين بكميه كبيره او اخذ الجرعه المعتاده بتاعته لكن ما اكلش فحصل انخفاض في السكر بتاعه.

 كمان ممكن مع الاقراص، لو عيان بياخذ اقراص زي السلفونيل يوريا ممكن برضو يحصل له انخفاض في السكر لكن الغالب الاعم اللي احنا بنشوفه في الاستقبال هو العيان اللي بياخذ انسولين ومكالش اواخذ انسولين بجرعة زيادة.

متي يشعر المريض بالاعراض؟

يبدا يشعر المريض بالاعراض غالبا لما السكر بتاعه يقل عن 60 مليغرام | dl ،

ما هي الاعراض اللي هييجي بيها المريض ؟

·       هتكون الاعراض دي زي الصداع ،

·       زغلله في العين ، عرق شديد ،

·       تعب وارهاق نرفزه وعصبيه ،

·       احساس بالجوع ، سرعه ضربات القلب ،

·        توهان وعدم تركيز ،

·       وفي الحالات الشديده او الحالات المستمرة التي لم تاخذ علاج ممكن لاقدر الله يحصل تشنجات و يحصل له غيبوبه و يحصل خلل دائم في خلايا المخ او يحصل الوفاة لا قدر الله.

احنا المفروض نخاف من انخفاض السكر اكتر ولا من ارتفاعه؟

مفيش شك ان الحالتين يجب ان نتجنبهم بكل المقاييس لكن احنا بنخاف من انخفاض السكر اكثر من ارتفاع السكر؛ لان انخفاض السكر ممكن يؤدي الى الوفاه في ظرف دقائق او ساعات قليله لكن ارتفاع السكر بيبقى في وقت شويه انك تفكر، وعشان كده لازم عيان السكر يكون عارف الاعراض دي كويس وعارف يتصرف ازاي لو حس بالاعراض دي ، ما يستناش لما تحصل غيبوبه او تشنجات، لو بدء يحس بزغلله وتوهان والحاجات اللي احنا قلنا عليها دي ياخذ عصير او قطعه حلوى فورا وطبعا لو امكن وقاس السكر عشان نتاكد يكون احسن وطبعا يرجع يتابع مع الدكتور بتاعه…

هتعمل ايه لو مريض سكر جالك الاستقبال؟

 لو مريض سكر جالك الاستقبال و بيشتكي من الاعراض دي فانت على طول بتقيس السكر و خلي في بالك ان قياس السكر في الاستقبال بقيت حاجه مهمه جدا ، تقريبا اي عيان انت شاكك فيه من اي اتجاه حتى لو هو ما عندوش سكر قيسله السكر ، احنا حتى بقينا نعتبرها كده زي vital signs لازم نقيس السكر لاي عيان في غيبوبه انت مش مطمئن له ..

فلو المريض ده جاي وانت قيستله السكر وطلع اقل من 60 وفيه اعراض من اللي قولنا عليها دي موجوده فانت هتتعامل معاه كالاتي : 

1.    اولا A,B,C زي اي عيان طوارئ وطبعا 

 A for airway ,B for breathing ,C for circulation

" يعني هنشوف المجري التنفسي بتاعه مفتوح ولا لا ، محتاج يتركبله tube ولا لا ، بيتنفس كويس ولا لا ، التنفس بتاعه شغال كويس ولا لا ، الدوره الدمويه شغالة كويس ولا لا ".

تركيب الكانيولا حاجه مهمه جدا في اي عيان طوارئ، اول ما ييجي اي عيان استقبال وانت شاكك انه في غيبوبة لازم اركبله كانيولا على طول.

2.    بعد كده بنشوف العيان بتاعنا وفيه اكتر من احتمال لو العيان بيقدر يبلع ويقدر ياكل ويشرب وتعاون بنديله عصير او قطعه حلوى فورا ونتابع معاه السكر باستمرار ، وننصحوا انه ياكل وجبه ونشوف هل متوقع نسبة السكر تنزل بعد شويه ولا لا ؛ لان لو كان متوقع وده غالبا مع واحد كان واخد اقراص ممتده المفعول زي sulphonylurea واللي بتشتغل 24 ساعه لازم احجزه  24 ساعه عشان لو السكر نزل ثاني اتعامل معه بسرعه وطبعا اقيسله السكر باستمرار.

 اما اذا كان مش فايق يعني في غيبوبه مثلا او في حاله هيجان شديد او في تشنجات ومش هيقدر يبلع ؛ في الحاله دي لازم طبعا اعلقله محلول جلوكوز ، ممكن ابدا معاه بجلوكوز 50 في المئه او %dextrose 50 ، هنديله من 25 الى 50 سم ، خلي بالك انك لازم تختار وريد كبير لان %dextrose 50 و الجلوكوز 50 في المئه ده بيبقى مُهيج شديد او بيعمل التهاب في الوريد ، وعشان كده بعد ما استخدمهم لازم اعمل saline flush لان بسبب هذا الجلوكوز العالي التركيز ممكن يحصل مشاكل كتيرة فيما بعد منها ممكن يحصل التهابات وتجلطات في الوريد.

طيب ممكن اتجنب المضاعفات دي؟

 اه ممكن اتجنب الموضوع ده عن طريق اني استخدم تركيزات اقل بكميات اعلى ، فممكن ادي مثلا 125 سم من الجلوكوز اللي تركيزه 20 في المئه  او 250 سم من الجلوكوز اللي تركيزه 10 في المئه  مثلا .

طيب هتعمل ايه لو العيان اصلا محجوز وكان مركب  nasogastric tube ؟

في الحاله دي ممكن اديله الجلوكوز ال 50 في الميه ده في الانبوبه المعديه وهتزود عليه نفس الكميه ماء.

هتعمل ايه لو مكانش فيه جلوكوز او اي شئ من اللي قولنا عليه ده متوفر؟

ممكن تدّي جلوكاجون 1 مللي جرام عضل او تحت الجلد وممكن بعد ده كله اركب جلوكوز 5 في المئه حاجه كده تحافظ على مستوى السكر.

بعد كم من الوقت ممكن يفوق المريض من الغيبوبة؟

من المتوقع ان الراجل ده يبدا يفوق من 5 ل 10 دقائق لكن من الممكن ما يرجعش الوعي بالكامل غير بعد ساعه كامله ، لكن لو استمر بقى هذا الوضع والراجل ما فاقش مع اني صلحت مستوى الجلوكوز في الدم لازم ابدا افكر في الاسباب الثانيه للغيبوبه غير انخفاض مستوى السكر زي ايه؟ زي مثلا الجلطات في المخ او لو واخذ سموم او ادويه بكميات كبيره او لا قدر الله ليكون حصل تلف دائم في المخ بسبب انخفاض السكر اللي حصل لهذه الفتره .

 

متنساش بعد ما العيان ما يفوق يفضل ان انا احجز لو شاكك ان ممكن السكر ينخفض مره ثانيه ، واشوف ايه اللي خلى العيان يدخل في الغيبوبة دي و اظبطله جرعاته واظبطله النظام الغذائي بتاعه واخليه يعرف امتى يتصرف و يعمل ايه لو حس بالاعراض دي.

طيب هتصرف ازااي لو العيان طلع مش مريض سكر اصلا ؟

 طيب نفترض ان  لو جاء للاستقبال عيان مش مريض سكر اصلا وكان مستوي السكر منخفض وهو لم يأخذ انسولين ولا اخذ اي اقراص لخفض السكر، في الحاله دي نبدا نفكر في الاسباب الثانيه اللي ممكن تؤدي الي انخفاض مستوى السكر في الدم زي مثلا واحد بيشرب كحوليات  alcohol intake ،او ورم بيطلع انسولين insulinoma ،او adrenal insufficiency, GH deficiency, IGF secreting tumor, sepsis, major organ failure,malnourshiment  

كل ده ممكن يسبب انخفاض مستوى السكر في الدم فلازم ادور على الاسباب دي واعمل لها فحوصاتها …….

شكرا ليكم وشكرا د تامر